हेडावे येथे वृक्षतोडीवरून वाद; जातीवाचक शिवीगाळ व जीवे मारण्याची धमकी दिल्याचा आरोप सुशांत ढिवरे यांचा अमळनेर पोलीस ठाण्यात तक्रार अर्ज; संबंधितांविरुद्ध कठोर कारवाईची मागणी.
अमळनेर/आबिद शेख 
अमळनेर : तालुक्यातील हेडावे येथे घरासमोरील जुने झाड परवानगीशिवाय तोडल्याच्या कारणावरून वाद निर्माण झाला असून, यावेळी जातीवाचक शिवीगाळ करून जीवे मारण्याची धमकी दिल्याचा आरोप करण्यात आला आहे. याप्रकरणी हेडावे येथील सामाजिक कार्यकर्ते सुशांत सुरेश ढिवरे (वय ३०) यांनी अमळनेर पोलीस ठाण्यात लेखी तक्रार अर्ज दाखल करून संबंधित व्यक्तीविरुद्ध कायदेशीर कारवाई करण्याची मागणी केली आहे.
झाड तोडण्याबाबत गावातील नागरिकांनी संबंधित व्यक्तीकडे विचारणा केली असता समाधानकारक माहिती न देता दिशाभूल करणारी उत्तरे देण्यात आल्याचा आरोपही करण्यात आला आहे.
दरम्यान, २८ सप्टेंबर २०२६ रोजी सुशांत ढिवरे यांनी झाड तोडण्याबाबत संबंधित व्यक्तीकडे विचारणा केली. त्यावेळी वाद वाढला आणि आपल्याला जातीवाचक अपशब्द वापरून शिवीगाळ करण्यात आली, तसेच जीवे मारण्याची व कुटुंबाला धोका निर्माण करण्याची धमकी देण्यात आल्याचा आरोप ढिवरे यांनी तक्रारीत केला आहे.
या घटनेमुळे आपल्या मालमत्तेचे नुकसान झाले असून, स्वतःसह कुटुंबाच्या सुरक्षिततेबाबत चिंता निर्माण झाल्याचे तक्रारदाराने म्हटले आहे. त्यामुळे या प्रकरणाची चौकशी करून भारतीय न्याय संहितेतील (BNS) लागू तरतुदी, महाराष्ट्र झाडे तोडण्यास प्रतिबंध अधिनियम तसेच अनुसूचित जाती व अनुसूचित जमाती (अत्याचार प्रतिबंधक) कायद्यानुसार लागू होणाऱ्या तरतुदींअंतर्गत कारवाई करावी, अशी मागणी करण्यात आली आहे.
या तक्रारीवर अमळनेर पोलीस ठाणे नेमकी कोणती कारवाई करते, तसेच कथित बेकायदेशीर वृक्षतोडीबाबत संबंधित वन विभागाकडून काय पावले उचलली जातात, याकडे हेडावेसह तालुक्यातील नागरिकांचे लक्ष लागले आहे.
दरम्यान, तक्रारीतील आरोपांची पोलिसांकडून चौकशी झाल्यानंतरच त्यातील तथ्य स्पष्ट होणार आहे.
