अमळनेर नगरपरिषदेचा ३८३.८३ कोटींचा अर्थसंकल्प मंजूर; विकासकामांना वेग देण्याचा दावा..

आबिद शेख/अमळनेर
अमळनेर, दि. २६ फेब्रुवारी २०२६ – शहराच्या आगामी विकासासाठी महत्त्वाचा मानला जाणारा सन २०२६–२७ या आर्थिक वर्षाचा ३८३.८३ कोटी रुपयांचा अर्थसंकल्प विशेष सभेत मंजूर करण्यात आला. नगराध्यक्ष डॉ. परीक्षित बाविस्कर यांच्या अध्यक्षतेखाली झालेल्या या सभेत अर्थसंकल्पाला अखेर मंजुरी देण्यात आली.

सादर करण्यात आलेल्या अर्थसंकल्पात कोणतीही नवीन कर वाढ प्रस्तावित करण्यात आलेली नसल्याचे स्पष्ट करण्यात आले. प्रशासनाच्या मते, हा अर्थसंकल्प शहराच्या सर्वांगीण विकासासाठी मार्गदर्शक ठरणार असून पायाभूत सुविधांवर विशेष भर देण्यात आला आहे.
यामध्ये मुख्यतः
शहरातील रस्त्यांचे काँक्रीटीकरण
पाणीपुरवठा यंत्रणेचे आधुनिकीकरण
स्वच्छता व्यवस्थेचे बळकटीकरण
सार्वजनिक आरोग्य सुविधांचे उन्नतीकरण
यांसारख्या बाबींना प्राधान्य देण्यात आले आहे. महिला व ज्येष्ठ नागरिकांसाठी आरोग्य सेवा अधिक सक्षम करण्याचा मानस देखील व्यक्त करण्यात आला.
वाढत्या शहरी गरजा लक्षात घेता शहरात सीसीटीव्ही यंत्रणा वाढविणे, पथदिव्यांची सुधारणा आणि इतर सुरक्षाविषयक उपाययोजनांचा समावेश अर्थसंकल्पात करण्यात आला आहे. याशिवाय कर वसुली अधिक प्रभावी करण्याबरोबरच विविध शासकीय योजनांमधून अतिरिक्त निधी उपलब्ध करून आणण्याचा प्रयत्न राहणार असल्याचे सांगण्यात आले.
प्रशासनाच्या मते, हा अर्थसंकल्प केवळ आर्थिक ताळेबंद नसून शहराच्या भविष्यातील विकासाचा आराखडा आहे. नागरिकांना अधिक दर्जेदार मूलभूत सुविधा उपलब्ध करून देणे आणि शहराचा संतुलित विकास साधणे हा यामागील प्रमुख उद्देश असल्याचे सभेत नमूद करण्यात आले.
सभागृहात सविस्तर चर्चेनंतर अर्थसंकल्पास मंजुरी देण्यात आली असून पुढील अंतिम मान्यतेसाठी तो जिल्हाधिकारी, जळगाव यांच्याकडे पाठविण्यात येणार आहे.
या निर्णयामुळे शहरातील विकासकामांना गती मिळण्याची अपेक्षा व्यक्त केली जात आहे.