मुंबईत एआयएमआयएमच्या हिंदू उमेदवाराचा ऐतिहासिक विजय; गोवंडी प्रभागातून विजय उबाळे विजयी..
24 प्राईम न्यूज 18 Jan 2025
मुंबई : ऑल इंडिया मजलिस-ए-इत्तेहादुल मुस्लिमीन (एआयएमआयएम) पक्षाच्या वतीने लढणारे हिंदू उमेदवार विजय उबाळे यांनी २०२६ च्या बृहन्मुंबई महानगरपालिका निवडणुकीत गोवंडी येथील प्रभाग क्रमांक १४० मधून निर्णायक विजय मिळवला आहे. त्यांनी १,२३७ मतांच्या आघाडीने प्रतिस्पर्धी उमेदवारांचा पराभव केला.
हा विजय असदुद्दीन ओवैसी यांच्या नेतृत्वाखालील एआयएमआयएम पक्षासाठी अत्यंत महत्त्वाचा मानला जात असून, पारंपरिक अल्पसंख्याक मतदारांपलीकडे पक्षाचा जनाधार वाढत असल्याचे स्पष्ट संकेत यातून मिळत आहेत. विजय उबाळे यांच्या विजयानंतर समर्थकांनी जल्लोष करत मोठ्या उत्साहात आनंद व्यक्त केला असून, या सेलिब्रेशनचे व्हिडिओ सध्या सोशल मीडियावर मोठ्या प्रमाणात व्हायरल होत आहेत.
विजय उबाळे कोण आहेत?
विजय उबाळे हे गोवंडी परिसरातील सुप्रसिद्ध समाजसेवक म्हणून ओळखले जातात. त्यांनी शिंदे गटाची शिवसेना, शिवसेना (उद्धव बाळासाहेब ठाकरे), राष्ट्रवादी काँग्रेस (शरदचंद्र पवार गट) तसेच आम आदमी पक्षाच्या उमेदवारांचा पराभव केला. त्यांच्या प्रचाराचा मुख्य केंद्रबिंदू प्रभागातील मूलभूत सुविधा, विकासकामे आणि स्थानिक प्रश्न होता.
मुंबईत एआयएमआयएमची वाढती ताकद
२०२६ च्या मुंबई महापालिका निवडणुका एआयएमआयएमसाठी ऐतिहासिक ठरल्या आहेत. एक्झिट पोलचे अंदाज फोल ठरवत पक्षाने मुंबईत तब्बल ८ जागांवर विजय मिळवला आहे. मागील निवडणुकांच्या तुलनेत ही मोठी वाढ असून, देशातील सर्वात श्रीमंत महानगरपालिकेत एआयएमआयएमचा प्रभाव वाढत असल्याचे चित्र स्पष्ट झाले आहे.
