वर्धमान नगरात पाणीटंचाईने नागरिक त्रस्त; सात दिवसांचा अल्टिमेटम! शेजारील वस्त्यांना पुरेसे पाणी, मग वर्धमान नगरावरच अन्याय का? महिलांचा संतप्त सवाल; पाणीपट्टी न भरण्याचा इशारा.

अमळनेर/आबीद शेख 

अमळनेर : अमळनेर शहरातील वर्धमान नगर परिसरात कमी दाबाने पाणीपुरवठा होत असल्याने रहिवाशांना तीव्र पाणीटंचाईचा सामना करावा लागत आहे. तासभर पाणीपुरवठा सुरू असला, तरी कमी दाबामुळे प्रत्यक्षात केवळ १५ ते २० मिनिटेच पाणी मिळत असल्याची तक्रार स्थानिक महिलांनी केली आहे. या गंभीर समस्येकडे नगरपरिषद प्रशासनाने तातडीने लक्ष द्यावे, अन्यथा सात दिवसांनंतर नगरपरिषदेवर मोर्चा काढण्यात येईल, असा इशारा महिलांनी दिला आहे.
पाहणी झाली, मात्र पाणीसमस्या कायम!

वर्धमान नगरातील पाणीपुरवठ्याच्या समस्येबाबत स्थानिक नगरसेवक आणि नगरपरिषद अधिकाऱ्यांनी परिसराची पाहणी केली होती. मात्र, त्यानंतरही पाणीपुरवठ्यात अपेक्षित सुधारणा झालेली नसल्याने नागरिकांमध्ये नाराजी वाढली आहे. केवळ पाहणी करून प्रश्न सुटणार नाही, तर प्रत्यक्ष उपाययोजना करून पुरेशा दाबाने नियमित पाणीपुरवठा करावा, अशी मागणी रहिवाशांकडून होत आहे.
सुंदर नगर, आल्हाद नगरला पाणी; वर्धमान नगरच तहानलेले!
वर्धमान नगरालगत असलेल्या सुंदर नगर आणि आल्हाद नगर परिसरात पुरेसे पाणी मिळत असल्याचा दावा महिलांनी केला आहे. मात्र, शेजारीच असलेल्या वर्धमान नगरातील नागरिकांना पाण्यासाठी संघर्ष करावा लागत असल्याने त्यांनी प्रशासनाच्या पाणीवाटपाच्या नियोजनावर प्रश्न उपस्थित केले आहेत. एकाच शहरातील शेजारील वस्त्यांमध्ये पाणीपुरवठ्याबाबत एवढी तफावत का, असा संतप्त सवाल महिलांनी केला आहे.
पूर्ण पाणीपट्टी वसुली, तरी नळाला पाणी नाही!
नगरपरिषद नागरिकांकडून पूर्ण पाणीपट्टी वसूल करते; मात्र त्याबदल्यात पुरेसा पाणीपुरवठा होत नसेल, तर नागरिकांनी कर भरायचा तरी कशासाठी, असा सवाल स्थानिक महिलांनी उपस्थित केला आहे. पाणी ही मूलभूत गरज असूनही वारंवार तक्रारी करून नागरिकांना दिलासा मिळत नसल्याने महिलांनी आता आंदोलनाचा मार्ग स्वीकारण्याचा निर्धार व्यक्त केला आहे.
सात दिवसांत प्रश्न सोडवा, अन्यथा नगरपरिषदेवर मोर्चा!
वर्धमान नगरातील पाणीपुरवठा पुढील सात दिवसांत सुरळीत करून पुरेशा दाबाने नियमित पाणी उपलब्ध करून द्यावे, अशी मागणी महिलांनी केली आहे. निर्धारित मुदतीत समस्या न सुटल्यास नगरपरिषदेवर मोर्चा काढण्यात येईल. तसेच पाणीपुरवठ्याची समस्या कायम राहिल्यास पाणीपट्टी न भरण्याचा आणि पाणीपट्टी वसुलीवर बहिष्कार टाकण्याचाही इशारा महिलांनी दिला आहे.
आता नगरपरिषद प्रशासन या प्रश्नाची गांभीर्याने दखल घेऊन ठोस उपाययोजना करते का, की वर्धमान नगरातील नागरिकांना पाण्यासाठी आणखी प्रतीक्षा करावी लागते, याकडे परिसरातील रहिवाशांचे लक्ष लागले आहे.