किशोरवयीन मुलांसाठी ओपनएआयचा नवा ‘चॅटजीपीटी’.

अमळनेर/आबिद शेख.     

                                                             कृत्रिमबुद्धिमत्तेचा वापर तरुणांमध्ये झपाट्याने वाढत असताना, आघाडीची तंत्रज्ञान कंपनी OpenAI ने किशोरवयीन मुलांसाठी विशेष सुरक्षा वैशिष्ट्यांसह ‘ChatGPT for Teens’ हे नवे व्हर्जन आणले आहे. १३ ते १७ वर्षे वयोगटातील विद्यार्थ्यांना अभ्यास, दैनंदिन प्रश्न आणि विविध विषयांवरील माहिती मिळवताना सुरक्षित वातावरण उपलब्ध करून देणे, हा या सुविधेमागील उद्देश आहे.

या व्हर्जनमध्ये आत्महत्या, स्व-इजा, मद्यपान, अमली पदार्थांचे सेवन तसेच लैंगिक आणि रोमँटिक स्वरूपाच्या संवादांवर अधिक कडक निर्बंध ठेवण्यात आले आहेत. विद्यार्थ्यांनी एआयवर पूर्णपणे अवलंबून राहू नये, यासाठी त्यांना तयार उत्तरे किंवा थेट निबंध देण्याऐवजी स्वतः विचार करून उत्तर शोधण्यासाठी टप्प्याटप्प्याने मार्गदर्शन केले जाणार आहे.
किशोरवयीन मुलांमध्ये एआयशी भावनिक जवळीक किंवा अवलंबित्व निर्माण होऊ नये, याचीही काळजी घेण्यात आली आहे. चॅटबॉट स्वतःला मानवी भावना असलेला किंवा जिवंत असल्याचे भासवू शकणार नाही.

या सुविधेत पालकांच्या संमतीने मुलांचे खाते लिंक करण्याचीही व्यवस्था करण्यात आली आहे. पालकांना मुलांच्या ChatGPT वापरासाठी ‘Quiet Hours’ निश्चित करता येणार असून, मुलांच्या सुरक्षिततेशी संबंधित गंभीर परिस्थिती आढळल्यास पालकांना सूचना मिळू शकतील.
तसेच, वापरकर्त्यांच्या प्रश्नांच्या स्वरूपावरून त्यांच्या वयाचा अंदाज घेण्याची प्रणाली कंपनीकडून वापरली जाणार आहे. १८ वर्षांपेक्षा कमी वयाचा वापरकर्ता असल्याचे आढळल्यास त्याला स्वयंचलितपणे किशोरवयीनांसाठी असलेल्या अधिक सुरक्षित अनुभवाकडे वळवले जाईल.