भूमिपुत्र आमदार अनिल दादांच्या वाढदिवसानिमित्त समाजोपयोगी उपक्रम सचिन पाटील यांच्या पुढाकारातून अत्याधुनिक रुग्णवाहिकेचे लोकार्पण.

आबिद शेख/अमळनेर

भूमिपुत्र आमदार अनिल दादा पाटील यांच्या वाढदिवसाचे औचित्य साधत कोणताही सोहळा, केक वा पुष्पगुच्छ न करता समाजहिताचा आदर्श उपक्रम राबवण्यात आला आहे. कृषी उत्पन्न बाजार समितीचे संचालक व अंतुर्ली रंजाने ग्रुप ग्रामपंचायतीचे माजी सरपंच सचिन बाळू पाटील (सचिन दादा) यांनी स्वखर्चातून एक अत्याधुनिक रुग्णवाहिका तयार करून तिच्या लोकार्पणाचा मानस व्यक्त केला आहे.

७ जुलै रोजी आमदार अनिल दादा पाटील यांचा वाढदिवस असून, त्यांच्या प्रेरणेतून हा समाजोपयोगी निर्णय घेण्यात आला आहे. नेहमीच जनतेच्या सेवेसाठी तत्पर असलेल्या दादांच्या कार्याची ही सामाजिक सलामी ठरत आहे.

शहर व तालुक्यात अपघातांचे प्रमाण वाढले असून, रुग्णांना वेळीच वैद्यकीय मदत मिळण्यात अडचणी निर्माण होत आहेत. शासकीय रुग्णवाहिकांची अनुपलब्धता आणि १०८ सेवेवरील ताणामुळे अनेक वेळा रुग्ण व त्यांच्या कुटुंबीयांना गंभीर त्रास सहन करावा लागतो. अलीकडेच एका महिलेची रस्त्यावरच प्रसूती झाल्याची दुर्दैवी घटना घडली.

ही परिस्थिती लक्षात घेऊन सचिन दादा पाटील यांनी कोणतीही राजकीय अपेक्षा न ठेवता निःस्वार्थ भावनेतून ही रुग्णवाहिका तयार केली आहे. या उपक्रमामुळे मतदारसंघातील गरजूंना आवश्यक वेळी उपचारासाठी मोठी मदत मिळणार आहे.