जिल्हा परिषद उपविभागीय अभियंत्याच्या घरझडतीत कोट्यवधींची बेहिशेबी मालमत्ता उघड! अमळनेर तालुक्यातील डांगरी येथील निवासस्थानी कारवाई; सोन्या-चांदीसह प्लॅटिनमचे दागिने, लाखोंची रोकड आणि बँक लॉकरमधील मालमत्ता जप्त.

अमळनेर/आबिद शेख

अमळनेर : जिल्हा परिषदेचे उपविभागीय अभियंता सतीश मनसुलाल शिसोदे यांच्या घरावर लाचलुचपत प्रतिबंधक विभागाने केलेल्या झडतीत कोट्यवधी रुपयांची बेहिशेबी मालमत्ता आढळून आली आहे. अमळनेर तालुक्यातील डांगरी येथील त्यांच्या निवासस्थानी करण्यात आलेल्या तपासणीत मोठ्या प्रमाणावर रोकड, सोन्या-चांदीचे दागिने तसेच प्लॅटिनमचे दागिने आढळले आहेत.

झडतीदरम्यान सोन्याचे बिस्किट, पाटल्या, चेन, बांगड्या यांसह विविध प्रकारचे दागिने मिळून आले. तसेच चांदीचे लगड, ताट, वाट्या आणि इतर वस्तूही आढळल्या. याशिवाय बँक लॉकरमध्येही प्लॅटिनमचे दागिने असल्याची माहिती समोर आली आहे.

या कारवाईत लाखो रुपयांची रोख रक्कम आणि मोठ्या प्रमाणावर मौल्यवान वस्तू मिळून आल्याने शिसोदे यांच्या मालमत्तेबाबत तपास यंत्रणांकडून अधिक चौकशी सुरू आहे.

लाच घेताना रंगेहात पकडण्यात आलेल्या सतीश शिसोदे यांना लाचलुचपत प्रतिबंधक विभागाने अटक केली असून, ४ नोव्हेंबर रोजी न्यायालयात हजर केले असता त्यांना पोलीस कोठडी सुनावण्यात आली आहे.