अमळनेर शेतकरी सहकारी संघाच्या नव्या संचालक मंडळाची पहिली सभा; महत्त्वाच्या निर्णयांना एकमताने मंजुरी प्रशासनाला गती देण्यासाठी चार उपसमित्यांची स्थापना; आर्थिक शिस्त, पारदर्शकता आणि शेतकरीहितावर भर.

अमळनेर/आबिद शेख 

अमळनेर  : अमळनेर तालुका शेतकरी सहकारी संघाच्या पंचवार्षिक निवडणुकीनंतर नव्याने निवडून आलेल्या संचालक मंडळाची पहिली सभा संघाच्या मुख्य कार्यालयात उत्साहपूर्ण व सकारात्मक वातावरणात पार पडली. नव्या नेतृत्वाच्या उपस्थितीत झालेल्या या बैठकीत संस्थेच्या प्रशासन, आर्थिक शिस्त, संघटनात्मक बळकटी आणि भविष्यातील कामकाजाच्या दृष्टीने अनेक महत्त्वपूर्ण निर्णय एकमताने घेण्यात आले.

सभेच्या प्रारंभी नवनियुक्त प्रेसिडेंट संभाजी लोटनराव पाटील तसेच व्हाईस प्रेसिडेंट गणेश धर्मराज भामरे यांचा संचालक मंडळाच्या वतीने पुष्पगुच्छ देऊन सत्कार करण्यात आला. यावेळी उपस्थित संचालकांनी दोन्ही पदाधिकाऱ्यांचे अभिनंदन करत माजी मंत्री तथा आमदार अनिल भाईदास पाटील यांच्या नेतृत्वाखाली आणि नव्या नेतृत्वाच्या मार्गदर्शनाखाली संघ अधिक सक्षम, पारदर्शक व शेतकरीहिताचे निर्णय घेणारी संस्था म्हणून पुढे जाईल, असा विश्वास व्यक्त केला.
यानंतर सभेच्या कामकाजास सुरुवात करण्यात आली. सभेमध्ये एकूण सहा विषयांवर सविस्तर चर्चा करून त्यांना एकमताने मंजुरी देण्यात आली. सर्वप्रथम दि. १० जून २०२६ रोजी झालेल्या मागील सभेचे इतिवृत्त कायम करण्यात आले. त्यानंतर दि. १ जून ते ३० जून २०२६ या कालावधीतील मुख्य कार्यालयाचा जमाखर्च संचालक मंडळासमोर सादर करण्यात आला. उत्पन्न, खर्च आणि आर्थिक व्यवहारांचा सविस्तर आढावा घेतल्यानंतर तो एकमताने मंजूर करण्यात आला.
यावेळी महाराष्ट्र सहकारी संस्था अधिनियम, १९६० मधील कलम ७३ अन्वये संचालक मंडळाचे बंधपत्र (बाँड) तयार करण्याबाबत चर्चा होऊन आवश्यक कार्यवाही तातडीने पूर्ण करण्याचा निर्णय घेण्यात आला. तसेच दि. १९ जून २०२६ रोजी नवनियुक्त प्रेसिडेंट यांना संस्थेच्या वतीने सह्यांचा अधिकार देण्यासाठी काढण्यात आलेल्या सर्क्युलेटिंग मेमोसलाही सभेने एकमताने मंजुरी दिली.
चार उपसमित्यांची स्थापना
संस्थेचे दैनंदिन कामकाज अधिक गतिमान, पारदर्शक आणि परिणामकारक व्हावे, विविध विभागांतील निर्णय प्रक्रिया जलद व्हावी तसेच प्रत्येक विभागावर प्रभावी देखरेख राहावी या उद्देशाने चार स्वतंत्र उपसमित्यांची स्थापना करण्यात आली.
शेतकी विभाग उपसमितीच्या अध्यक्षपदी सुषमा वासुदेव देसले यांची नियुक्ती करण्यात आली. सदस्य म्हणून संजय पुनाजी पाटील, मालुबाई बापूराव पाटील, सचिन बाळू पाटील आणि सुरेश पिरन पाटील यांचा समावेश करण्यात आला असून प्रेसिडेंट संभाजी पाटील व व्हाईस प्रेसिडेंट गणेश भामरे हे आमंत्रित सदस्य राहतील.
जिन विभाग उपसमितीच्या अध्यक्षपदी रणजीत भीमसिंग पाटील यांची नियुक्ती करण्यात आली. सदस्य म्हणून संजय पुनाजी पाटील, विक्रांत भास्कर पाटील, जितेंद्र दिनकर पाटील आणि मालुताई बापूराव पाटील यांची निवड करण्यात आली.
नोकर नियंत्रण उपसमितीच्या अध्यक्षपदी शंकर बंडू बैसाणे यांची निवड झाली. सदस्य म्हणून नितीन बापूराव पाटील, श्याम साहेबराव पवार, सचिन बाळू पाटील आणि प्रफुल्ल हिरालाल पवार यांचा समावेश करण्यात आला.
शासकीय धान्य खरेदी उपसमितीच्या अध्यक्षपदी विक्रांत भास्कर पाटील यांची नियुक्ती करण्यात आली. सदस्य म्हणून संजय पुनाजी पाटील, सचिन बाळू पाटील, सुभाष सुकलाल पाटील आणि नितीन बापूराव पाटील यांची निवड करण्यात आली. सर्व उपसमित्यांमध्ये प्रेसिडेंट संभाजी पाटील व व्हाईस प्रेसिडेंट गणेश भामरे हे आमंत्रित सदस्य राहणार आहेत.
बैठकीत या उपसमित्यांमार्फत संबंधित विभागांचे नियोजन, अंमलबजावणी, आर्थिक शिस्त, कार्यक्षमता आणि शेतकरीहिताचे निर्णय अधिक प्रभावीपणे राबविण्यात येतील, असा विश्वास व्यक्त करण्यात आला.
व्यवस्थापकांनी सादर केला सविस्तर आढावा
यावेळी संघाचे व्यवस्थापक संजय पाटील यांनी संस्थेचा आर्थिक व प्रशासकीय लेखाजोखा, विविध विभागांच्या कामकाजाचा सविस्तर आढावा तसेच चालू व प्रस्तावित उपक्रमांची माहिती संचालक मंडळासमोर मांडली. संस्थेची आर्थिक स्थिती, विविध विभागांचा जमाखर्च, प्रलंबित कामे आणि आगामी नियोजन याबाबत त्यांनी सविस्तर सादरीकरण केले. संचालकांनी या माहितीचा बारकाईने आढावा घेत समाधान व्यक्त केले तसेच भविष्यात अधिक पारदर्शक, शिस्तबद्ध आणि शेतकरीहिताला प्राधान्य देणारे प्रशासन राबविण्यासाठी आवश्यक सूचना केल्या.
सभेच्या शेवटी आयत्यावेळी उपस्थित करण्यात आलेल्या विषयांवरही सकारात्मक चर्चा झाली. आगामी काळात संघाचे आधुनिकीकरण, आर्थिक शिस्त, पारदर्शक प्रशासन, सभासद-केंद्रित सेवा आणि शेतकरी कल्याणाला सर्वोच्च प्राधान्य देत संघाला प्रगतीच्या नव्या उंचीवर नेण्यासाठी सर्व संचालकांनी एकजुटीने कार्य करण्याचा निर्धार व्यक्त केला. नव्या संचालक मंडळाच्या पहिल्याच बैठकीत घेतलेल्या या महत्त्वपूर्ण निर्णयांमुळे अमळनेर तालुका शेतकरी सहकारी संघाच्या प्रशासनाला अधिक बळ मिळणार असून सभासद शेतकऱ्यांना अधिक सक्षम, गतिमान व पारदर्शक सेवा उपलब्ध होतील, असा विश्वास यावेळी व्यक्त करण्यात आला.