नीट आंदोलनाचा मोठा परिणाम; धर्मेंद्र प्रधानांचा राजीनामा, प्रल्हाद जोशींकडे शिक्षण मंत्रालयाची धुरा.
24 प्राईम न्यूज 26 Jul 2026
नवी दिल्ली : नीट पेपर लीक प्रकरणावरून देशभरात सुरू असलेल्या विद्यार्थ्यांच्या तीव्र आंदोलनानंतर केंद्रीय शिक्षणमंत्री धर्मेंद्र प्रधान यांनी आपल्या पदाचा राजीनामा दिला आहे. राष्ट्रपती द्रौपदी मुर्मू यांनी शनिवारी सायंकाळी त्यांचा राजीनामा स्वीकारला असून, केंद्रीय मंत्री प्रल्हाद जोशी यांच्याकडे शिक्षण मंत्रालयाचा अतिरिक्त कार्यभार सोपविण्यात आला आहे.
राष्ट्रपती भवनाने जारी केलेल्या निवेदनानुसार, पंतप्रधान नरेंद्र मोदी यांच्या शिफारशीवरून धर्मेंद्र प्रधान यांचा राजीनामा तत्काळ प्रभावाने मंजूर करण्यात आला. त्याचबरोबर केंद्रीय ग्राहक व्यवहार, अन्न व सार्वजनिक वितरण मंत्री प्रल्हाद जोशी यांच्याकडे शिक्षण मंत्रालयाची अतिरिक्त जबाबदारी देण्यात आली आहे.
नीट पेपर लीक प्रकरणाच्या निषेधार्थ देशभरातील विद्यार्थी अनेक दिवसांपासून आंदोलन करत होते. दिल्लीतील जंतर-मंतर येथे सुरू असलेल्या आंदोलनात हजारो विद्यार्थी सहभागी झाले होते. २० जुलै रोजी विद्यार्थ्यांनी संसदेकडे मोर्चा काढला होता. आंदोलनादरम्यान धर्मेंद्र प्रधान यांच्या राजीनाम्याची मागणी प्रमुख होती.
राजीनाम्यानंतर आंदोलनकर्त्यांच्या प्रतिनिधींनी केंद्रीय मंत्री जे. पी. नड्डा आणि जितेंद्र सिंह यांच्यासोबत चर्चा केली. या बैठकीत नीट पेपर लीक प्रकरणाशी संबंधित आत्महत्या केलेल्या विद्यार्थ्यांच्या कुटुंबीयांना ₹१ कोटींची आर्थिक मदत देण्यास तसेच आंदोलनादरम्यान विद्यार्थ्यांवर दाखल करण्यात आलेले गुन्हे मागे घेण्यास सरकारने सकारात्मक भूमिका घेतल्याचे सांगण्यात आले. त्यानंतर आंदोलनकर्त्यांनी आपले आंदोलन मागे घेत असल्याची घोषणा केली.
या घडामोडींमुळे नीट पेपर लीक प्रकरणाला नवे राजकीय व प्रशासकीय वळण मिळाले असून, देशभरात या निर्णयाची चर्चा सुरू आहे.
